Каир. 24 қазан. Египетте күштік құрылымдар лаңкестікпен күресте қыруар шығынға ұшырап жатыр, деп хабарлайды Хабар 24 телеарнасы.

Арнайы операциялар ірі ұрыс қимылдарына ұқсайды. Әскер содырларға қарсы ұшақтар мен танкілерді де қолдануға мәжбүр. Бірақ мұндай әрекеттен қайран болмай тұр. Жұма күні елдің батысындағы Гиза аймағында лаңкестермен қақтығыс кезінде 16 сарбаз көз жұмған. Бейресми дерекке қарағанда, күні бүгінге дейін 58 жауынгер оққа ұшқан.

Қарулы қақтығыстар Синай түбегінде өтіп жатыр. Сарапшылар жергілікті әскердің түбектегі лаңкестерге қарсы тұруға қауқарсыз екенін айтады. Өйткені аз қоныстанған үлкен түбекті ел әскерінің толық өз бақылауына алу мүмкін емес. Содырлар да туризммен аты шыққан аймақты әдейі таңдап алған. Себебі мемлекет кірісінің басым бөлігін де осы сала құрайды.