АТЫРАУ, 29 наурыз. Атырауда 112 сәләфит өздерінің бұрыс діни көзқарастарынан бас тартып, дәстүрлі ислам дініне қайта оралды, деп kazislam.kz хабарлайды.
«Жүргізіліп жатқан оңалту жұмыстарының нәтижесінде деструктивті діни ағымдардың 112 ұстанушысы дәстүрлі исламға қайтарылды», — деді Атырау облысы Дін істері басқармасының басшысы Қайролла Кушкалиев брифингте сөйлеген сөзінде.
«Олардың ішінде 78 қала тұрғыны және төрт ауыл тұрғыны бар. Олар — жазасын өтеп жатқандар, пробациядағы адамдар, Сириядан оралған әйелдер, «Жусан» операциясы барысында оралған бір азамат, сондай-ақ шетелдік діни университеттердің студенттері мен түлектері».
Облыстық дін істері басқармасының мәліметінше, Атыраудағы оңалту орталықтарында 532 теолог-психолог жұмыс істейді. Өткен жылы олар өтініш берген 435 азаматқа көмек көрсетті. Олар сонымен бірге терроризм үшін жазасын өтеп жатқан тұтқындармен жұмыс істейді. 2019 жылы теолог-психологтар 41 тұтқынмен 330 жеке және 25 жалпы кездесулер ұйымдастырды.
Жуырда облыс орталығындағы ірі базарлардың бірінің иелері «Шапағат» қоғамдық қорының теологтарына тегін үй-жай бөлді. Қазір бұл оңалту орталығында деструктивті діни ағымдардың жақтаушыларымен түсіндіру жұмыстары жалғасуда.
