НҰР-СҰЛТАН, 28 ақпан. Сомали астанасы Могадишода жойқын жарылыс болып, үш адам қаза тапты, деп Анадолу агенттігі хабарлайды.

Құқық қорғау органдарындағы ақпарат көздеріне сәйкес, жарылғыш зат Әбдіқасим көшесінде орнатылып, әскери колонна өтіп бара жатқанда іске қосылған.

Жарылыс астананың бірнеше ауданында естілді.

Сомали билігі бұл оқиғаға қатысты түсініктеме берген жоқ.

Жарылыс үшін жауапкершілікті әлі ешкім өз мойнына алған жоқ.

«Аш-Шабаб» лаңкестік ұйымы Сомалиде қауіпсіздік күштері мен азаматтық нысандарға қарсы шабуылдарды жиі ұйымдастырады.