НҰР-СҰЛТАН, 04 маусым. Франция полициясы элзасстық Мюлуз қаласына жақын жерде неонацистік қарулы топты залалсыздандырды, деп News.IsraelInfo агенттігіне сілтеме жасап «Терроризмге қарсы комитет» РҚБ ресми сайты  хабарлайды.

Өткен сейсенбіде қауіпсіздік күштерінің операциясы нәтижесінде 45 пен 53 жас аралығындағы төрт ер адам ұсталды. 200 жандарм олардың Жоғары Рейн департаментінің төрт елді мекеніндегі үйлерін қоршап алды және тінту нәтижесінде олар қару-жарақ пен армиялық оқ-дәрілердің қоймаларын тапты.

Тәртіп сақшылары 41 атыс қаруын,автоматтарға арналған 167 оқжатар (оның 72-сі Калашников автоматына), бір тоннаға жуық патрондар (120 мың дана) және 35 келі жарылғыш зат тәркіледі. Үйлерде оқ-дәрі шығаратын көптеген құрылғылар да болды. Жергілікті полиция бастығының айтуынша, «қоймалардың үлкен болғаны сонша, оларды даналап емес, салмағына қарай бағалау керек».

Үйлерден антисемиттік және неонацистік әдебиеттердің үлкен көлемі, соның ішінде Холокостты жоққа шығарушылардың шығармалары табылды. Ұсталған үш адам полицияға бұрынғы қарулы шабуылдарымен белгілі болғанымен, күдіктілер «басқалар сияқты әлеуметтенген азаматтар» деп сипатталады.

Сондай-ақ олардың кітапханасынан АҚШ-тағы ақ нәсілдердің үстемдігі қозғалысының жетекшілерінің бірі Уильям Лютер Пирстің кітабын, атап айтқанда оның американдық неонацистерге арналған анықтамалық «Тернер күнделіктері» дистопиялық романын тапты. Бұл жұмыс халықты бақылау үшін бейкүнә адамдар массасын жою идеясын уағыздайды.