Астана. 18 қаңтар. Қазақстанда террорлық қауіптің «сары деңгейі» кезінде азаматтар тарапынан күдікті заттар туралы айтылған хабарламалар саны 127,7 пайызға артқан, деп хабарлайды ҚазАқпарат.

«2016 жылы уәкілетті органдар азаматтар тарапынан қауіпті заттар туралы 426 хабарлама қабылдады. Соның ішінде, 130 хабарлама 2016 жылдың 6 маусымына дейін, яғни, террорлық қауіптің «сары деңгейі» енбей тұрғанда, ал, 296 хабарлама «сары деңгей» енгізілгеннен кейін қабылданған»,-деп хабарланған Ұлттық қауіпсіздік комитетіне ресми жолданған сауалға жауабында.

Жалпы, 2016 жылы қауіпсіздікті сақтау қызметтері террорлық акт туралы 157 құпия қоңырау қабылдаған екен. Оның ішінде, 95 қоңырау 6 маусым мен 31 желтоқсан аралығында қабылданған ақпараттар.

Естеріңізге сала кетейік, 2017 жылдың 16 қаңарынан бастап Қазақстанда террорлық қауіптің «сары деңгейі» жабылды.

2016 жылдың 6 маусымында Ақтөбе қаласында орын алған террорлық актіден кейін Қазақстан Республикасының аумағында террорлық қауіптің «сары деңгейі» енгізілген болатын.

Дереккөз: ҚазАқпарат