Астана. 24 ақпан. Үш жыл бойына халықаралық іздеуде жүрген уағызшы елге қайтарылды. Діни экстремизм мен тәкфіршілік идеясын насихаттаған Әбдухалил Әбдужаппаров теріс діни ағымды ұстанушылар арасында Шейх Халил есімімен белгілі. Енді ол заң алдында жауап беретін болады.

Радикалды діни бағытты уағыздаушының ғаламторда жүздеген роликтері жүр. Онда ол Қазақстандықтарды кәпірлерге қарсы қару алып күресуге шақырып лаңкестік идеяларды насихаттап келді. Ұлттық қауіпсіздік комитеті мәліметтеріне сенсек, ол 2 мыңыншы жылдардың бас кезінде Атырау, Ақтөбе, Орал қалалары тұрғындарын тәкфіршілікке үндеген. Тәкфір идеясы —  бұл радикалдардың түсінігіндегі кәпірлерге қарсы күрес, және ол бірінші кезекте мұсылмандарға қарсы бағытталған. Яғни уахаббилік ағымға бой алдырмаған, дәстүрлі мұсылманшылықты ұстанатын көпшілікке қарсы бағытталған. Әбдухалил Әбдіжаппаров Сауд Арабиясынан депортацияланды. Айта кету керек, оның шәкірттері еліміздің аумағында лаңкестік шабуылдар ұйымдастырған. Олардың ішінде Оңтүстік Қазақстан обылсы, Қазығұрт Ауданының 16 жастағы тұрғыны да бар. Ол әлеуметтік желіде экстремизмді насихаттағаны үшін сотталды.

«Абдухалилдің теріс пиғылдағы діни уағыздарына арбалған ондаған отандасымыз Сирия, Ауғанстан сияқты соғыс ошақтарына барып, жалған жиһадқа қатысып, жан берді. Отбасыларына қайғы қасірет әкелді. Ел аумағында лаңкестік әрекеттер жасады» — «Контртеррористік комитет» РҚБ төрағасы Аманжол Оразбаев.

Бүгін сондай-ақ Қарағанды облысының аппеляциялық соты былтыр жыл соңында сотталған Балқаш экстремистеріне қатысты шыққан үкімнің күшін өзгеріссіз қалдырды. Есте болса, 10 нан 14 жылға дейін арқалаған 7 экстремист жазаны жеңілдетуді сұраған болатын. Айта кету керек, Ұлттық қауіпсіздік комитеті соңғы жылдары экстремистік идеялардың таралуы мен алдын алуға қарсы күресті күшейткен.

«2013 жылдан бастап Ұлттық қауіпсіздік комитетімен 57 экстремистік жайттың алды алынды. Жалған жиһадқа шықпақшы болған 278 қазақстандықтың жолы кесілді. Ал соғыс ошақтары мен лаңкестік белсенділік шоғыры жоғары елдерден оралған 79 отандасымыздың қазір 34-і қылмыстық жауапқа тартылды» — «Контртеррористік комитет» РҚБ төрағасы Аманжол Оразбаев.

Дереккөз: Евразия Бірінші арнасы