НҰР-СҰЛТАН, 05 қараша. Томскіде «Иегова куәгерлері» ұйымының аймақтық филиалының жетекшісі сотталды, деп Томск облысы бойынша Тергеу комитетінің тергеу басқармасына сілтеме жасап REGNUM хабарлады.

Ведомствоның хабарлауынша, ер адам экстремистік ұйымның қызметін ұйымдастырғаны үшін кінәлі деп танылды (Ресей Федерациясының Қылмыстық кодексінің 282.2 бабы 1 бөлігі). Оған қатысты қылмыстық іс Ішкі істер министрлігі мен ФҚҚ-нің облыстық департаменттерінің материалдары негізінде қозғалды.

Сотталушы «Иегова куәгерлері» аймақтық ұйымының  жетекшісі бола отырып, Ресей Федерациясы Жоғарғы Сотының осы ұйымды экстремистік деп тану және оны тарату туралы шешімі заңды күшіне енетіні туралы білді. Алайда, 2017 жылдың сәуірінен 2018 жылдың маусымына дейін ол ұйымның заңсыз әрекеттерін жалғастыру үшін белсенді қадамдар жасады. Атап айтқанда, ол жиналыстар өткізіп, құлшылық етіп, уағыздар айтты. Сондай-ақ, ол қайырымдылық түрінде ақша жинады. Сонымен бірге ол өз қызметін құқық қорғау органдарынан жасырын түрде өткізуге тырысты.

Тергеу барысында ер адам кінәсін мойындамай, жауап беруден бас тартты. Алайда сот оны кінәлі деп тауып, алты жылға бас бостандығынан айырды. Сот үкімі заңды күшіне енген жоқ және оған шағым жасалуы мүмкін.