НҰР-СҰЛТАН, 06 ақпан. Көші-қон заңнамасының жаңа ережелеріне сәйкес 5 күн ішінде шетелдіктерді уақытша тіркеу жойылды, деп baq.kz хабарлайды.
Көлік полицейлері жыл басынан бері көші-қон заңнамасын бұзған 100-ден астам шетелдікті анықтады.
Көліктегі полиция департаменті сервистік модельге көшу аясында өткен жылдың қараша айынан бастап, Нұр-Сұлтан және Алматы қалаларының халықаралық әуежайларында тәулік бойы жұмыс істейтін көші-қон пункттері құрылды.
Биыл қазақстандық көші-қон заңнамасына өзгерістер мен толықтырулар енгізілді. Ағымдағы жылдың 10 қаңтарынан бастап күшіне енген заңнама нормалары бойынша шетел азаматтарының республика аумағында болуына жеке және заңды тұлғалар — Қазақстан Республикасының азаматтары жауапты болады. Шетелдіктерді қабылдайтын ҚР азаматы үш күнтізбелік күн ішінде көші-қон қызметіне олардың келуі туралы хабар беруге міндетті. Көші-қон заңнамасының жаңа ережелеріне сәйкес 5 күн ішінде шетелдіктерді уақытша тіркеу жойылды. Шетелдік азамат 30 тәуліктен астам болған жағдайда уақытша болуға рұқсат ресімделеді, — делінген хабарламада.
Сонымен қатар, полиция қызметкерлеріне ӘҚБтК-нің 517-бабы (болу мерзімін бұзу) бойынша әкімшілік айыппұл салу өкілеттіктері берілген, оның мөлшері болу мерзімін бұзуға байланысты тағайындалады (мысалы, 3 тәулікке дейін – ескерту, 5 тәулікке дейін — 5 АЕК, 10 тәулікке дейін — 10 АЕК).
Аталған түзету материалдарды сотқа жібермей және шетелдікті рейстен алып тастамай-ақ әкімшілік құқық бұзушылық бойынша 10 тәулікке дейінгі мерзімге шешім қабылдауға мүмкіндік береді.
Ағымдағы жыл басынан бері көлік полицейлерінің жүргізген профилактикалық іс-шараларының нәтижесінде 111 шетелдік азаматтың Қазақстан Республикасында болу мерзімдерін бұзғаны анықталды. Сондай-ақ көші-қон заңнамасын бұзғаны үшін Қазақстан Республикасының 40-қа жуық азаматы әкімшілік жауапкершілікке тартылды. Бұл ретте қабылдаушы тарап шетелдік азаматтардың болуы туралы хабарлама ретінде шаралар қабылданбады.
