НҰР-СҰЛТАН, 05 қаңтар. Дүйсенбі күні Нигерде елдің солтүстік-батысында 2 қаңтарда исламистер өлтірген 100 адамды еске алу үшін жалпыұлттық үш күндік аза тұту жарияланды. Бұл туралы Нигердің ішкі істер, қоғамдық қауіпсіздік, орталықсыздандыру және дәстүрлер мен діндер министрі Алькаш Альхада мәлімдеді, деп хабарлайды ТАСС .
«Біз бүкіл ел бойынша үш күндік аза тұту жарияладық», — деп France-Presse агенттігі министрдің сөзін келтірді. Альхадтың айтуынша, бұл шешім Нигер Ұлттық Қауіпсіздік кеңесінің отырысында қабылданған.
2 қаңтарда мотоцикл мінген екі топ исламистер бір уақытта Тиллабери аймағындағы екі ауылға шабуыл жасады. Чома Бангоуда 70 адам, Зарумадарейде — 30 адам қаза болып, тағы 25 адам ауыр жарақат алды, деп мәлімдеді аудан әкімі Алму Хасане екі ауылға барғаннан кейін.
Тиллабери аймағы үш елдің — Нигердің , Малидің және Буркина-Фасоның шекаралары тоғысатын стратегиялық маңызды аймақта орналасқан . Африканың бұл бөлігінде «Ислам мемлекетінің» (Қазақстанда тыйым салынған) құрылымы болып табылатын «Батыс Африкадағы Ислам мемлекеті» экстремистік лаңкестік тобының исламистері әрекет етеді. 2017 жылдан бастап Тиллабери аймағында төтенше жағдай күшіне енді. Нигер үкіметі бір жыл бұрын Тиллабериде мотоциклдермен жүруге тыйым салған.
