НҰР-СҰЛТАН, 06 қаңтар. Польшаның Ішкі қауіпсіздік агенттігі тергеуді аяқтап, республикада лаңкестік шабуылды  дайындаған екі күдіктіге қатысты айыптау қорытындысын сотқа жіберді. Бұл туралы поляк арнайы қызметінің жұмысын үйлестіретін министрдің баспасөз хатшысына сілтеме жасап ТАСС хабарлайды.

Оның айтуынша, ұсталғандар жарылғыш заттарды қолданбақ болған.

«Ішкі қауіпсіздік агенттігінің қорытындысына сәйкес, шабуыл ислам қауымдастығының белгілі бір діни объектісіне жасалуы керек еді. Зиянкестер сонымен қатар белгілі бір адамдар арасында улы заттарды таратуды жоспарлаған. Ондағы мақсат — Польшаның «исламдануына» жол бермеу», — делінген хабарламада.

«Айыпталушылар өздерінің радикалды көзқарастарын білдірген, бірі ұлттық, этникалық, нәсілдік және діни айырмашылықтарға негізделген зорлық-зомбылыққа, қылмыстарға, жеккөрушілікке шақырып,  діни топтарды жою қажеттілігін де ашық айтты. Қылмыскерлердің екіншісі өзіндік  манифест  түрінде зерттеу жасаған, мұнда ол өзінің жеке көзқарастарын, исламофобияны білдіретін және Польшадан тыс келген қонақтарды қудалауға шақырады: бұзақылық пен қорқытудан бастап, атыс қаруы мен жарылғыш заттарды қолдануға дейін», — деп хабарлады поляк арнайы қызметі.

Тергеу барысында жарылғыш заттар, төрт атыс қаруы, соның ішінде автоматты тапанша мен оқ-дәрілер, сондай-ақ қауіпті материалдар мен заттарды дайындауға мүмкіндік беретін бұйымдар мен құралдар табылғаны туралы хабарланды. Сонымен қатар, қылмыскерлердің бірі атыс қаруын, оқ-дәрілерді және жарылғыш заттарды өндіргені белгілі болды.

Ұсталғандар 10 жылға дейін бас бостандығынан айырылуы мүмкін.