ҚАРАҒАНДЫ, 12 қаңтар. Қарағандыда белгісіз біреу облыстық клиникалық ауруханада «бомба барын» айтты. Медициналық мекемеден 300 адам эвакуацияланды, — деп хабарлайды Tengrinews.kz.

Жедел әрекет ету орталығынына аноним хабарлама сағат 11.15-те түскен. Белгісіз біреу Қарағандыдағы облыстық клиникалық ауруханада жарылғыш құрал барын айтқан. Төтенше жағдай қызметкерлері бірден оқиға орнына шыққан. Олар ең алдымен ғимарат ішіндегі адамдарды эвакуациялады.

«Барлық сақтық шарасын сақтау қажет болғандықтан медициналық мекемеден 300 адам эвакуацияланды. Науқастар (160 адам) жедел түрде қауіпсіз жерге жеткізілді, медициналық қызметкерлер (120 адам) және келушілер (20 адам) сыртқа шығарылды. Облыстық клиникалық аурухананы тексеру кезінде жарылғыш құрал табылмады. Бүгінде полицейлер жалған ақпарат таратқан адамды жедел іздеу шараларымен айналысып жатыр», — деді Қарағанды облысы ПД баспасөз қызметінің өкілдері.