НҰР-СҰЛТАН, 08 ақпан.  Оңтүстіктегі Пусан портты қаласында жағалау күзеті контейнер тасушыдан 35 келі кокаин тәркіледі, деп хабарлайды ҚазАқпарат YONHAP агенттігіне сілтеме жасап.

Билік өкілдерінің мәлімдемесі бойынша, есірткінің құны 105 миллиард вон (93,94 миллион АҚШ доллары) және оны бір уақытта 1 миллион адам қабылдай алады.

Пакеттер Либерия жалауы бар, 15 желтоқсанда Колумбиядан шығып, Пусанның жаңа жағалауына 19 қаңтарда жеткен кемеден табылды. Ал конверттерде колумбиялық наркокартельдер пайдаланатын шаян бейнеленген логотип болған.

Билік өкілдері су сыйымдылығы 140 000 тонна кемеде үлкен көлемде кокаин жасырылған деген ақпараттан кейін оның ізіне түскен. Оңтүстік Америка елінен келетін тұрақты лайнер АҚШ, Панама каналы, Оңтүстік Корея және Қытай арқылы өтеді.

Кеме экипажы құрамында Грекия, Ресей және Украина азаматтары болған. Жағалау күзетінің мәлімдемесі бойынша, есірткілер кемеге қалай тиелді және олардың қатысы бар-жоғы тексеріліп жатыр.