НҰР-СҰЛТАН, 12 ақпан. Полиция қызметкерлері Мәскеу түбінде ай сайын 500 кг-ға жуық синтетикалық есірткі дайындайтын есірткі зертханасын анықтады. Тінту кезінде 165 кг есірткі тәркіленді.Бұл туралы Ішкі істер министрлігінің ресми өкілі Ирина Волкқа сілтеме жасап ТАСС  хабарлайды.

 «Жедел-іздестіру іс-шараларының нәтижесінде полиция қызметкерлері Мәскеу облысының Волоколамск ауданындағы жалға алынған жеке үйде орналасқан есірткі зертханасын жойды.  Зертхана айына 500 кг-ға жуық синтетикалық есірткі өндіре алатындығы анықталды . Оларды Ресейдің аймақтарында бетбелгілердің көмегімен сату жоспарланған болатын», — деді Волк.

Волктың айтуынша, тінту кезінде зертханадан шамамен 165 кг мефедрон, екі тоннадан астам прекурсорлар және басқа заттар, сондай-ақ арнайы жабдық, оның ішінде екі химиялық реактор алынды. «Бұл операция қара нарыққа жалпы сомасы 300 миллион рубль болатын тыйым салынған заттың 800 мыңнан астам бір реттік дозасын өткізбеуге мүмкіндік берді», —  деді Волк.

Ол есірткі сақтаған күдіктінің ұсталғанын, осы факті бойынша Ресей Федерациясы Қылмыстық кодексінің 228.1-бабы (есірткіні заңсыз өндіру, сату немесе жіберу) бойынша қылмыстық іс қозғалғанын атап өтті.