НҰР-СҰЛТАН, 18 наурыз.   Сирияда он жылдық қақтығыста 12 мың бала қаза болды немесе жарақат алды, бүгінде кәмелетке толмағандардың 90 пайызы гуманитарлық қолдауға мұқтаж — бұл 2019 жылмен салыстырғанда 20 пайызға артық. Бұл туралы БҰҰ Балалар қорына  (ЮНИСЕФ) сілтеме жасап Анадолу агенттігі хабарлайды.

ЮНИСЕФ өткен жылы Сирияда тұтыну себетінің құны 230 пайызға артқанын еске салады; жарты миллионнан астам бала созылмалы тамақтанбау салдарынан даму бөгелісінен зардап шегеді; Сирияда 2,5 миллион бала және көрші елдерде тұратын 750 мыңға жуық сириялық жасөспірімдер мектепке бармайды.

Қақтығыстың он жылында, тек тексерілген мәліметтерге сәйкес, 12 мың бала жарақат алып, қаза тапты,  5,7 мыңнан астамы әскерге шақырылды. Өткен жылы психикалық бұзылыстар белгілері бар балалар саны екі есе өсті – балалар зорлық-зомбылық пен өлімнің куәсі болып, күн сайын жарақат алады.

Елдің солтүстігінде жағдай өте ауыр, миллиондаған адамдар шатырларда тұрып жатыр, ал олардың көпшілігі бірнеше қоныс аударды. Өткен қыс баспанасы жоқ, толассыз жаңбыр мен қар астында, балшық пен мұздың ортасында өмір сүретін бұл сириялықтар үшін нағыз сынақ болды.

Сирияда адам құқығының өрескел бұзылуының 75 пайыздан астамы елдің солтүстік-батысында тіркелген. Дәл осы  атақты Аль-Хол лагері орналасқан, онда әлемнің 60 елінен кем дегенде 27,5 мың бала тұрып жатыр.

ЮНИСЕФ жанжалдасушы тараптарды балаларды және азаматтық инфрақұрылымды нысанаға алмауға шақырады, сонымен қатар трансшекаралық жеткізілімдерді қамтамасыз ету туралы қаулыны жаңартуға шақырады. Зорлықпен қолына қару алған балаларға бейбіт өмірге ойдағыдай ену үшін көмек қажет.