НҰР-СҰЛТАН, 08 сәуір. Сәрсенбі күні Нигерияның оңтүстік-шығысындағы Бенуэ штатындағы құрылыс алаңына белгісіз қарулы содырлар шабуыл жасап, Қытай азаматы мен Нигерияның екі полиция қызметкерін өлтіріп, тағы екі Қытай азаматын кепілге алды. Бұл туралы Синьхуа агенттігі жергілікті полицияға сілтеме жасап хабарлады.
Сәрсенбі күні сағат 07:30 шамасында қытайлық қызметкерлер мен оларды алып жүруге жауапты бірнеше нигериялық полиция қызметкерлеріне құрылыс алаңының жанында содырлар шабуыл жасады, деп телефон арқылы Бенуэ штатының полициясындағы дереккөз Синьхуа агенттігіне хабарлады. Полиция мен содырлар арасында атыс болып, салдарынан Қытай азаматы мен екі полиция қызметкері қаза тапты. Қарулы адамдар Қытайдың екі азаматын да ұрлап әкеткен.
Осы дереккөздің хабарлауынша, полиция оқиға орнына қосымша күштер жіберген, полиция содырлардың ізіне түсіп, Қытай азаматтарын босатуға күш салып жатыр.
Сол күні Қытайдың Лагостағы Бас консулдығы Синьхуаға Нигерия жағымен белсенді байланыс орнатып, ұрланған Қытай азаматтарын құтқару үшін бар күш-жігерін салатынын хабарлады.
