НҰР-СҰЛТАН, 08 маусым. Жедел іздестіру іс-шаралары барысында елорда аумағында құпия орынға синтетикалық есірткі қалдырып кетумен айналысатын қылмыстық топ ұсталды, деп хабарлайды ҚазАқпарат.

Атап айтқанда, Нұр-Сұлтан қалалық полиция департаментінің мәліметінше, Абылай хан даңғылы бойында 38 және 40 жастағы апалы-сіңлілер ұсталды. Әйелдерді жеке тінту барысында салмағы шамамен 5 грамм болатын «скорость» синтетикалық есірткі заты табылды. Ақмола облысынан келген апалы-сіңлілердің Кравцов көшесі бойында жалға алған пәтерін тінту барысында таразы және құпия орынға қалдырып кетуге дайын 15 орама және 90-нан астам дозаға жеткілікті синтетикалық есірткі тәркіленді. Аталған факті бойынша қылмыстық іс қозғалды.

Осы ретте қалалық полиция департаменті есірткі заттарын заңсыз сақтау және таратқаны үшін жауапкершілік бар екендігін ескертеді.