НҰР-СҰЛТАН, 30 маусым.  Тәжікстан президенті Эмомали Рахмон Ауғанстан Ұлттық Ассамблеясы парламентінің төменгі палатасының («Волеси Джирга») басшысы Мир Рахмон Рахмонимен кездесу өткізді, деп Мемлекет басшысының баспасөз қызметіне сілтеме жасап Sputnik Тәжікстан хабарлайды.

Кездесу барысында тараптар Тәжікстан мен Ауғанстан арасындағы ынтымақтастық процесін, атап айтқанда, парламенттік байланыстарды, саясат, қорғаныс, қауіпсіздік, экономика, сауда, ғылым, білім, БАҚ және денсаулық сақтау салаларын қоса, әр түрлі салалардағы қатынастарды дамыту мәселелерін талқылады.

Рахмон мен Мир Рахмон Рахмони көрші Ауғанстандағы қазіргі жағдайға ерекше назар аударды.

Ауғанстанда жалғасып жатқан әскери қақтығыстарға және бүкіл халықаралық қауымдастықтың алаңдаушылығын тудырып отырған саяси және әскери жағдайдың шиеленісуіне байланысты тараптар қауіпсіздік саласында тығыз ынтымақтастықтың қажеттілігін атап өтті.

Рахмон Тәжікстан халқы тек географиялық тұрғыдан ғана емес, сонымен қатар ортақ құндылықтар позициясы тұрғысынан Ауғанстан халқының жағында болатынын тағы бір  атап өтті.

«Біз елдегі бейбітшілікті, тұрақтылықты және экономиканың қалпына келуі жөніндегі достық, біртұтас және көп мәдениетті елдің үкіметі мен халқының бастамаларын қолдаймыз», — деді мемлекет басшысы.

Тараптар террористермен және есірткінің заңсыз айналымымен айналысатын ұйымдасқан қылмыстық топтармен күрес жөнінде тиімді шаралар қабылдауға уағдаласты.

Сонымен қатар, тараптар энергетика және көлік сияқты инфрақұрылымдық бағыттарды дамыту, сондай-ақ елдер арасында жаңа дәліздер құру туралы пікір алмасқандығы атап өтілді.

Рахмон Ауғанстан парламентінің төменгі палатасының басшысын елді қауіпсіздік саласында қолдайтындығына сендірді.