НҰР-СҰЛТАН, 30 қаңтар. Нижний Новгородтың Мәскеу аудандық соты мектепке қарулы шабуыл жасауды жоспарлады деген күдікпен үш жасөспірімді екі айға қамауға алды, деп Нижегород облысының жалпы юрисдикция соттарының бірлескен баспасөз қызметі хабарлайды. Бұл туралы ТАСС агенттігіне сілтеме жасап «Терроризмге қарсы комитет» РҚБ ресми сайты хабарлайды.
«Үшеуіне қатысты 26 наурызды қоса алғанда қамауға алу түріндегі бұлтартпау шарасы таңдалған», — деді баспасөз өкілі.
Бұған дейін тергеу органдары 16-17 жас аралығындағы жасөспірімдерге қатысты Ресей Федерациясының Қылмыстық кодексінің 30 бабының 1-бөлігі, 105-бабының 2-бөлігінің «а» тармағы («Екіден астам адамды өлтіруге дайындық») бойынша қылмыстық іс қозғаған болатын. Тергеушілердің мәліметінше, үш жасөспірім Нижний Новгородтағы мектепке шабуыл жасауды жоспарлаған. Нижегород облысы бойынша Федералдық қауіпсіздік қызметі басқармасының баспасөз қызметі ТАСС агенттігіне күдіктілердің бірі 2021 жылдан бері күнделік жүргізгенін, онда жарылғыш заттарды жасау туралы нұсқаулар жазылған жазбалардың, басқаларға және өзіне деген жеккөрініш туралы мәлімдемелер бар екенін хабарлады.
ФҚҚБ мәліметінше, топтың кәмелетке толмаған мүшелерінің бірі өз-өзіне қол жұмсамақ болған. Жедел іс-шаралар барысында оның тағы екі танысымен білім беру мекемесіне қарулы шабуыл жасау ниеті бар екені расталды. Сондай-ақ ол жарылғыш заттарды өндіруге арналған құрамдас бөліктерді үйде сақтау фактісін мойындады. 2021 жылдың желтоқсаны мен 2022 жылдың қаңтары аралығында күдіктілер шабуыл жасау үшін Нижний Новгородтың Канавин ауданындағы оқу орнын таңдап, студенттер мен қызметкерлерді атып өлтіруді жоспарлаған, сонымен қатар жасөспірімдер шабуылдың күнін де белгілеп қойған.
