НҰР-СҰЛТАН, 12 ақпан. Йеменнің орталық бөлігіндегі Мариб провинциясындағы зымырандық шабуылдың салдарынан үш бала қаза болды, деп Anadolu агенттігіне сілтеме жасап «Терроризмге қарсы комитет» РҚБ ресми сайты хабарлайды..

Бұл туралы минадан тазарту және жарылмаған оқ-дәрілер мен миналардың салдарынан өлім-жітімді бақылайтын жергілікті құқық қорғау ұйымы хабарлады. Үкіметтік емес ұйымдардың мәліметінше, балалар Мариб провинциясының Хариб ауданында қаза болған.

Ақпанның 9-ы күні құқық қорғаушылар Йеменде ираншыл «Ансарулла» (хуситтер) қозғалысының көтерілісшілері қойған миналар мен оқ-дәрілердің жарылуы нәтижесінде биылғы жылдың қаңтарында Йеменде 36 бейбіт тұрғын қаза тапқанын және  37 адам жарақат алғанын хабарлады.

Йеменде 2014 жылдан бері қарулы қақтығыс жалғасуда, оған бір жағынан «Ансарулла» шииттік қозғалысының (хуситтер) көтерілісшілері мен Йеменнің құлатылған президенті Әли Абдулла Салехтің жақтастары, екінші жағынан, президент Абдурабб Мансур Хадиге адал үкімет әскерлері. Хуситтер ел астанасын, Сана қаласын және басқа да аудандарды бақылауда ұстайды.

Сауд Арабиясы бастаған араб коалициясының қолдауымен үкімет күштері 2015 жылдың наурыз айынан бері хуситтермен соғысуда.

БҰҰ-ның есептеріне сәйкес, соғыс басталғаннан 2021 жылдың соңына дейін Йемендегі соғыс тікелей немесе жанама түрде 377 мың адамның өмірін қиды. Әлемдегі ең кедей елдердің бірі Йемендегі гуманитарлық дағдарыс қорқынышты деңгейге жетті.