НҰР-СҰЛТАН, 08 маусым. Италия портында қомақты мөлшерде кокаин және шамамен 2 миллион еуро қолма-қол ақша да тәркіленді, деп TRT агенттігіне сілтеме жасап «Терроризмге қарсы комитет» РҚБ ресми сайты жазады.
Италияның қаржы полициясы (Guardia di Finanza) Триест портында 4,3 тонна кокаин тәркілеген.
Италиялық «ANSA» агенттігінің хабарына қарағанда, елдің солтүстік-шығысындағы маңызды порт қаласы Триестте Мафияға қарсы аймақтық дирекциясы мен қаржы полициясы топтарының бірлескен жұмысы нәтижесінде 4,3 тонна кокаин тәркіленді. Портта шамамен 2 миллион еуро қолма-қол ақша да тәркіленді.
Хабарламада Триест портында тәркіленген кокаин мөлшерінің Еуропадағы ең жоғары көрсеткіш екені айтылған.
Операция аясында Еуропа мен Колумбия арасындағы есірткі саудасымен айналысқан 38 күдіктіге қамауға алу және үйқамақ сияқты алдын алу шараларының қолданылғаны атап өтілді.
