НҰР-СҰЛТАН, 03 тамыз. АҚШ тұрғындарды «Әл-Каида» (Қазақстанда бұл ұйымға тыйым салынған) жетекшісі өлтірілгеннен кейін антиамерикалық зорлық-зомбылық ықтималдығынан сақ болуға шақырды, — деп хабарлайды Tengrinews.kz тілшісі Reuters агенттігіне сілтеме жасап.
АҚШ Мемлекеттік департаменті лаңкестік ұйым жетекшінің өлтірілуі «Әл-Каида» жақтастарын АҚШ нысандарына немесе бейбіт тұрғындарға шабуыл жасауға итермелеп, америкалықтарға қарсы зорлық-зомбылықты арттыруы мүмкін деп ескертті.
«2022 жылдың 31 шілдесінде әл-Завахири қайтыс болғаннан кейін «Әл-Каида» немесе оған қатысы бар террористік ұйымдардың жақтастары АҚШ нысандарына, қызметкерлеріне немесе азаматтарына шабуыл жасауға әрекеттенуі мүмкін. Мемлекеттік департамент қазір антиамерикалық зорлық-зомбылық ықтималдығы жоғары деп санайды», — делінген хабарламада.
«Қазіргі ақпарат лаңкестік ұйымдардың әлемнің көптеген аймағында АҚШ мүддесіне қарсы лаңкестік әрекеттерді жоспарлап отырғанын көрсетеді. Бұл шабуылдар жанкешті операцияларды, қастандықтарды, тонау және жарылыстарды қоса алғанда, кең ауқымды тактиканы қолдануы мүмкін», — деп қосты ол.
Еске салайық, Ауғанстан астанасында Орталық барлау басқармасының (ЦРУ) ұшқышсыз ұшқышпен жасаған соққысы нәтижесінде Усама бен Ладен қайтыс болғаннан кейін лаңкестік топты бақылауға алған «Әл-Каида» жетекшісі өлтірілді. Ол АҚШ-та 3000-ға жуық адам өмірін қиған 11 қыркүйектегі шабуылдарды ұйымдастыруға көмектескен.
