НҰР-СҰЛТАН, 30 тамыз. АҚШ пен оның одақтастары Ауғанстаннан шығарылғаннан бері өткен бір жылда елдегі лаңкестік белсенділік деңгейі төмендеді, деп мәлімдеді БҰҰ-ның Ауғанстандағы гуманитарлық мәселелер жөніндегі үйлестірушісі Рамиз Алакбаров.Бұл туралы РИА Новости агенттігіне сілтеме жасап «Терроризмге қарсы комитет» РҚБ ресми сайты жазады.
Соңғы бір жылда Ауғанстандағы лаңкестік қаупіне қатысты жағдай өзгерді ме деген сұраққа жауап бере отырып, Алакбаров шілденің аяғында – тамызда АҚШ контингентінің Ауғанстаннан шығарылуының бір жылдығы қарсаңында шабуылдар күшейгенін айтты.
«Жалпы, алдынғы жылдармен, өткен жылмен салыстырғанда (террорлық) белсенділік, егер жарылыс, атыс туралы айтатын болсақ, төмендеді», — деп қосты ол.
Ол Ауғанстандағы билеуші «Талибан» қозғалысы* ИМ-мен* және «Әл-Каидамен»* белсенді түрде күресіп жатыр деп мәлімдейтінін атап өтті, «бірақ соңғы оқиғалар, соның ішінде Кабулда «Әл-Қаида» жетекшісі Айман аз-Завахиридің табылуы көріністі сәл өзгертті».
«Біз жағдайды мұқият бақылауды жалғастырамыз. Біз алаңдаймыз, бірақ біз жұмысты жалғастырамыз. Әрине, бұл оқиғалар Ауғанстан үшін қосымша ресурстарды жұмылдыруға ықпал етпейді және біз үшін ресурстарды жинау қазірдің өзінде қиын», — деді Алакбаров.
2021 жылдың тамыз айының басында «Талибан» қозғалысы* Ауғанстанның үкімет күштеріне қарсы шабуылын күшейтті, ал 15 тамызда тәлібтер Кабулға кірді. Келесі күні олар соғыстың аяқталғанын хабарлады. Тамыздың соңғы екі аптасында америкалық әскерилер қорғауындағы Кабул әуежайынан Батыс елдерінің азаматтары мен олармен қызметтес болған ауғандықтарды жаппай эвакуациялау болды. 31 тамызға қараған түні АҚШ әскері Кабул әуежайынан шығып, АҚШ-тың Ауғанстандағы 20 жылға жуық әскери қатысуын аяқтады.
* Қазақстан Республикасында тыйым салынған ұйым
