АСТАНА, 18 қазан. Ауғанстандағы лаңкестік ұйымдардың ұстанымдары Таяу Шығыстан содырлардың көшуі арқылы нығайып отыр, деп мәлімдеді Тәжікстан президенті Эмомали Рахмон Душанбеде өтіп жатқан терроризмге қарсы күрестегі халықаралық және аймақтық ынтымақтастық жөніндегі жоғары деңгейдегі конференцияда. Бұл туралы Sputnik Тәжікстанға сілтеме жасап «Терроризмге қарсы комитет» РҚБ ресми сайты хабарлайды.

Оның айтуынша, содырлардың Ауғанстанға өтуі бүкіл аймаққа қауіп төндіреді.

«Қазіргі жағдайда Таяу Шығыстағы лаңкестердің басқа аймақтарға жіберілуі және осыған байланысты Ауғанстандағы халықаралық террористік ұйымдардың позицияларының нығаюы Орталық Азия елдеріне үлкен қауіп төндіреді», — деді Рахмон.

Тәжікстан президенті халықаралық және аймақтық ұйымдардың елеулі жұмысына қарамастан елдерде бұл қауіпті құбылысты анықтауда бірыңғай терминологиялық және құқықтық көзқарас жоқ екенін баса айтты.

Рахмон барлық мүдделі тараптар лаңкестік пен экстремизмнің егжей-тегжейлі түсіндірмесін қабылдамайынша, адамзатқа қарсы осы құбылыстармен күресте елдердің күш-жігерін үйлестіру мүмкін болмайтынын атап өтті.

Ол осы қауіп-қатерлерге қарсы күресте ортақ тәсілдер қажет екенін атап өтті.

Бұған дейін ҰҚШҰ Біріккен штабының басшысы, генерал-полковник Анатолий Сидоров Ауғанстанда халықаралық лаңкестік топтардың белсенділігі артқанын айтқан болатын.

Осылайша, лаңкестік әрекеттер жасау мақсатында «Ислам мемлекетінің»* 400-ге жуық содырын Ауғанстанның солтүстік провинцияларына көшіру тіркелді.

*- Қазақстан Республикасында тыйым салынған ұйым