АСТАНА, 20 қазан. Бейсенбі күні Тәжікстанда Ұжымдық қауіпсіздік шарты ұйымының (ҰҚШҰ) «Шекара-2022» оқу-жаттығулары аясында заңсыз қарулы жасақтарды жою бойынша маневрлер басталды. Бұл туралы ҰҚШҰ бірлескен баспасөз орталығы хабарлайды, деп ТАСС агенттігіне  сілтеме жасап  «Терроризмге қарсы комитет» РҚБ ресми сайты жазады.

«Бүгін Харбмайдон полигонында Тәжікстандағы «Шекара-2022» Орталық Азия аймағының Ұжымдық жедел орналастыру күштерімен (ОАА ҰЖОК) бірлескен оқу-жаттығуы аясында ОАА ҰЖОК келесі кезеңнің міндеттерін орындауға кірісті. Оның барысында заңсыз қарулы құрамаларға тосқауыл қою және жою бойынша бөлімшелерді басқару және мемлекеттік шекарадағы жағдайды қалпына келтіру бойынша арнайы іс-шаралар жүргізу мәселелері қаралды», — делінген хабарламада.

Харбмайдон полигонындағы тәжірибелік іс-шараларға Орталық Азия аймағына мүше мемлекеттердің әскери контингенттері, Біріккен штабтың және ҰҚШҰ хатшылығының жедел топтары қатысуда. Ресейлік контингенттің негізін 201-ші әскери базаның Орталық әскери округінің әскери қызметшілері құрайды. Оқу-жаттығуларға 1 мыңға жуық адам, 300-ден астам әскери және арнайы техника, соның ішінде ұшақтар, тікұшақтар және ұшқышсыз ұшу аппараттары қатысуда.

Маневрлер ҰҚШҰ-ның ұжымдық күштерімен ҰҚШҰ-ға мүше мемлекеттің аумағына басып кірген заңсыз қарулы топтарды жою бойынша ОАА ҰЖОК  жауынгерлік іс-қимылдарын дайындау және жүргізу мәселелерін пысықтауға бағытталған.

«Шекара-2022» оқу-жаттығулары 10-21 қазан аралығында өткізілсе, оқу-жаттығулардың белсенді кезеңі 17 қазанда басталды.