НҰР-СҰЛТАН, 27 қаңтар. Дюссельдорф қаласының Жоғарғы жер мәселелері жөніндегі соты 26 қаңтарда Тәжікстан тумасын «Ислам мемлекеті» террористік ұйымына мүше болған деген айыппен жеті жылға соттады, деп centralasian.org жазады.
Associated Press агенттігінің тергеуге сілтеме жасап хабарлауынша, 31 жастағы Равшан Б. Есімді азамат, Тәжікстаннан шыққан басқа да азаматтар кіретін террористік ұйыммен бірге, Германия мен Албания аумағында теракт және басқа да шабуылдар жасауды жоспарлаған.
Сотталушы мен оның адвокатының сот үкіміне қатысты ұстанымы әзірге белгісіз.
Германиядағы ДПА агенттігінің хабарлауынша, Тәжікстан азаматы сот үкімі шығардан бұрын тағылған айыптарды жартылай мойындаған, жасаған ісіне өкінген. Прокурор оны 8 жарым жылға соттауын сұраған.
Германия құқық қорғау органдарының мәліметі бойынша, Равшан Б. 2019 жылы наурызда ұсталған. Бір жылдан соң – 2020 жылғы сәуірде тағы төрт тәжікстандық ұсталды. Олар Германияның бірнеше қаласында теракт жасауды жоспарлаған делінеді.
Германияда тұратын тәжіктердің айтуынша, Равшан Б. Душанбеде тұрған, Ресейге жұмысқа барып, кейін Германияға ауысқан.
