НҰР-СҰЛТАН, 22 қараша. Британдық экономика және бейбітшілік институтының сарапшылары жыл сайын жасалатын «Global Terrorism Index – 2019» рейтингін жасады, деп kazislam.kz жазады.
Былтырғы жылмен салыстырғанда Қазақстан 10 пунктке көтеріліп, 160 мемлекеттің ішінде 85-ші орынды иеленді. Сарапшылар біздің еліміздегі лаңкестік қауіпінің өте төмен деңгейін атап өтті.
Ең қауіпсіз елдердің қатарына Түрікменстан мен Беларусь кіреді. Олар және бірқатар басқа елдер 138 орынға ие болды.
Өзбекстан рейтингтің 135-ші орында, Эстония мен Молдова 123-орында, Латвия 117-ші орында. Литва 107-орынға, ал Әзірбайжан 103-орынға ие болды.
Одан кейін Армения — 94 орын, Грузия — 90 орын, Қырғызстан — 87 орын.
Террористік қауіптің төмен орташа деңгейі бар елдер арасында Тәжікстан 50-ші орында, ал Ресей орташа деңгейі бар елдер арасында 37-ші орында.
Посткеңестік елдердің арасында сарапшылар рейтингте 24-орында тұрған Украинаны тағы да террористік қауіп-қатерлерге ең осал және қауіпсіздігі төмен деп таныды.
