НҰР-СҰЛТАН, 17 желтоқсан. Австралияда 2 жыл бұрын ұшақты жарып жібермек болған ағайындылар сотталды, деп 24.kz хабарлайды.
Сот Махмуд Хаятты 40 жылға, ал Халед Махмуд Хаятты 36 жылға бас бостандығынан айырды. Олар лаңкестіктік әрекетке дайындалып, қоғамда үрей туғызды деп айыпталған.
Естеріңізде болса, 2017 жылы Австралия полициясы Сидней мен Абу-Даби арасында қатынайтын ұшақты жармақ болған бірнеше адамды ұстаған еді. Лаңкестер электрлі ет турайтын машинаға бомба орнатып, сол арқылы ұшақты жарып жіберуді жоспарлаған. Алайда әуежай күзеті қырағылық танытып, қаскөйлер қолға түскен.
