Багдад. 12 наурыз. Иракта лаңкестік топтармен бірге мәжбүрлі түрде қару ұстап әскерилерге қарсы ұрыстарға қатысқан балаларды бейбіт өмірге бейімдеу жұмыстары қолға алынып жатыр, деп хабарлайды Хабар 24 телеарнасы.
Содырлардың тұтқынында болған бүлдіршіндер мен жасөспірімнің көбі – езидтер. Ер балалар қару ұстап, соғысса, қыздар күң болып, қорланып, зорланған. Қазір елде мұндай балаларды оңалтуға арналған 2 арнайы орталық бар. Онда балалар сурет салып, түрлі ойын ойнап, балдәурен шақтың қандай болу керектігін сезінеді. Жергілікті мұғалімдер оларға лаңкес деп қарамау керектігін айтады. Ал ЮНИСЕФ ұйымы өкілдерінің айтуынша, елде мұндай жеткіншектер мыңдап саналады. Бірақ содырлардың тұтқынында нақты қанша баланың болғаны туралы ақпарат жоқ.
Хошьяр Ходейда Сүлеймен, мұғалім:
– Лаңкестер бұл балаларды адамгершілікке тәрбиелемеген. Біз бұл курстарды балалардың діни алауыздықтан арылып, адамгершілікке және сүйіспеншілікке үйрету үшін ұйымдастырып отырмыз.
