НҰР-СҰЛТАН, 14 қаңтар. АҚШ-тың әділет министрі, бас прокуроры Уильям Барр АҚШ-тың Флоридадағы Пенсакола әскери-теңіз базасындағы 2019 жылдың желтоқсан айында Сауд Арабиясының азаматы жасаған атысты террористік акт деп атады. Ол бұл туралы дүйсенбіде Вашингтонда өткен баспасөз мәслихатында мәлімдеді.
«Бұл терроризм актісі болды. Айғақтар көрсеткендей, атқыш жиһадшылар идеологиясының ықпалында болған», — деді ол.
2019 жылдың 6 желтоқсанында Сауд Арабиясының әскери қызметкері Мұхаммед аш-Шамрани АҚШ-тың Флоридадағы Пенсакола әскери-теңіз күштерінің базасына оқ жаудырды. Ол Америка Құрама Штаттарына американдық нұсқаушылардың жетекшілігімен ұшу дағдыларын игеру үшін келді. Аш-Шамрани үш адамды өлтіріп, сегізін жаралады. Оны оқиға орнына келген тәртіп сақшысы атып өлтірді.
Оқиғадан кейін АҚШ билігі елде әскери дайындықта жүрген Сауд Арабиясының азаматтарын тексерді. Олар шамамен 850 адам.
