НҰР-СҰЛТАН, 28 ақпан. Пермь қаласында полиция 16 жастағы оқушыны ұстады. Ол синтетикалық есірткінің заңсыз айналымына қатысты, деп Пермь өлкесі бойынша Ішкі істер министрлігі басқармасының баспасөз қызметіне сілтеме жасап REGNUM хабарлады.

Ведомствоның мәліметінше, жас жігіт тыйым салынған заттарды өндіру мақсатында үш бөлмелі пәтерді жалға алған. Ол ата-анасына пәтер ауыл шаруашылығы дақылдарын өсіру бойынша тәжірибе жүргізу үшін қажет екенін айтты. Әкесі мен анасы ештенеге күмәнданбады, өйткені олар ұлына сенді, мектепте жасөспірім жағымды жағынан сипатталып,  құрдастарынан білмекке құмарлығымен ерекшеленген.

Жасөспірім ата-анасына жалдау ақысын тамақ жеткізу қызметінде курьер болып жұмыс істей отырып, адал жолмен тапқанын айтты.

Жігіт заңсыз әрекетке клининг компаниясында жұмыс істейтін 22 жастағы екі бойжеткен қызды тартты. Зертханада химиялық реактивтердің көмегімен тыйым салынған заттар дайындалып, белгілі жерге қалдыру арқылы сатылды.

Пәтерді тінту кезінде жедел уәкілдер 300 граммға жуық тыйым салынған заттарды тәркіледі, әртүрлі химиялық реактивтер мен зертханалық жабдықтарды тапты. Қылмыстық іс Ресей Федерациясы Қылмыстық кодексінің 30-бабы 3-бөлігі және 228.1-бабы 4-бөлігінің «г» пункті бойынша қозғалған («Аса ірі мөлшерде есірткі заттарын заңсыз өндіруге, өткізуге немесе жіберуге оқталу»).