НҰР-СҰЛТАН, 25 сәуір. Сенбі күні Нигерияның орталық аймағында қарулы қарақшылар тобы кем дегенде 11 адамды өлтірді. Бұл туралы Нигерияның Channels TV телеарнасына сілтеме жасап ТАСС хабарлайды .
«Шабуыл таңертең Насарава штатындағы Аджимака ауылына тұрғындары ұйықтап жатқан кезде жасалды, — дейді жергілікті даму қауымдастығының жетекшісі Питер Ахемба. — Бандиттер кезексіз оқ жаудырды, кем дегенде 11 адам қаза тапты, көптеген жаралылар бар». Оның айтуынша, кейбір тұрғындар ауылдан қашып кеткен.
Соңғы айларда Нигерияның солтүстік және орталық бөлігінде бейбіт тұрғындарға қарсы қарақшылық шабуылдардың едәуір өсуі байқалады. Қарулы бандалармен күресу үшін билік тұрақты армия бөлімдерін қолдануға мәжбүр.
