НҰР-СҰЛТАН, 15 маусым. Өзбекстан қорғаныс министрі Баходір Құрбанов пен Америка Құрама Штаттары Орталық қолбасшылығының қолбасшысы генерал Майкл Курилла дүйсенбі күні Орталық Азиядағы (ОА) қауіпсіздікті қамтамасыз ету бойынша екіжақты ынтымақтастықты нығайту мәселесін талқылады, деп республика Қорғаныс министрлігінің баспасөз қызметі мәлімдеді. Бұл туралы Синьхуа агенттігіне сілтеме жасап «Терроризмге қарсы комитет» РҚБ ресми сайты жазады.
Кездесу барысында өзбек-американ қарым-қатынастары теңдік, сенімділік, өзара құрмет, мүдделерді өзара есепке алу қағидаттары негізінде дамып, стратегиялық серіктестік деңгейіне жеткені атап өтілді. Өзбекстан мен АҚШ экстремизмге, діни радикализмге, халықаралық терроризмге және басқа да трансұлттық қауіптерге қарсы күресте ортақ мақсаттарға ие.
Екі мемлекеттің қорғаныс ведомстволары арасындағы ынтымақтастықтың жай-күйі мен перспективаларына ерекше назар аударылды. Атап айтқанда, әскери және әскери-техникалық салалардағы, сондай-ақ Орталық Азия аймағындағы қауіпсіздікті қамтамасыз ету саласындағы ынтымақтастық мәселелері талқыланды.
М. Курилла Өзбекстанға АҚШ Орталық қолбасшылығының жауапкершілігі аймағында орналасқан барлық аумақтар — барлығы 21 ел бойынша 90 күндік танысу сапары аясында келді.
