АСТАНА, 04 қараша. Пәкістанның экс-премьері бастаған оппозициялық шеруге жасалған шабуылдың салдарынан жеті адам жараланып, бір адам қаза тапты, деп хабарлайды РИА Новости Пенджаб провинциясының полициясына сілтеме жасап. Бұл туралы «Терроризмге қарсы комитет» РҚБ ресми сайты жазады.
«Пәкістан Техрик-и-Инсаф» төрағасы Имран Ханның көлігіне Вазирабадтағы шеру кезінде шабуыл жасалып, жеті адам жараланып , бір адам қаза тапты», — деп Dawn басылымы жариялаған полиция мәлімдемесінде айтылған.
Полицияның мәліметінше, қаза болған Муаззам Наваз екені анықталды.
Бұған дейін Geo телеарнасы Пәкістанның бұрынғы премьер-министрі Имран Ханның «Пәкістан Техрик-и-Инсаф» партиясының жақтастары кортежінің басында келе жатқан көлікке белгісіз біреу оқ атқаннан кейін оның аяғынан жараланғанын және төрт немесе бес партия жетекшісі де жарақат алғанын хабарлаған. Ханның жақтастарының бірі, Синд ассамблеясының бұрынғы мүшесі Имран Исмаилдің айтуынша, экс-премьердің аяғына үш-төрт рет оқ тиген.
Ұсталған күдікті Имран Ханды өлтіруді жоспарлағанын, жалғыз әрекет еткенін айтты.
Өткен аптада Пәкістанда оппозициялық «Пәкістан Техрик-и-Инсаф» партиясының жаңа сайлау өткізуді талап еткен шеруі басталды, наразылар 11 қарашаға дейін елдің астанасы Исламабадқа жетуді жоспарлап отыр.
Бұған дейінгі наразылық шеруі 25 мамырда Имран Ханның мыңдаған жақтастары Исламабадқа жеткенде өткен болатын. Шеру кезінде шерушілер полициямен қақтығысып, екі жақтан ондаған адам жараланды. Қақтығыс кезінде полиция қызметкерлері бірнеше рет көзден жас ағызатын газ қолданып, ауаға оқ жаудырған. Көп ұзамай «Пәкістан Техрик-и-Инсаф» шеруді аяқтап, қантөгіске жол бермеу үшін Исламабадта отырма ереуілді өткізбеу туралы шешім қабылдады.
